Asiya İnkişaf Bankının (AİB) Direktorlar Şurasının üzvlərindən ibarət nümayəndə heyəti ölkəmizə səfəri çərçivəsində Azərbaycan Dövlət Aqrar Universitetində (ADAU) olub.
Görüşün əsas məqsədi aqrar təhsil və elmi-tədqiqat sahələrində əməkdaşlıq imkanlarının müzakirəsi, universitetlə AİB arasında birgə layihələrin həyata keçirilməsi və kənd təsərrüfatının inkişafına yönələn təşəbbüslər üzrə fikir mübadiləsinin aparılması olub.
ADAU-nun rektoru Zəfər Qurbanov universitetin aqrar sektorun inkişafındakı rolundan danışıb. Rektor müasir kənd təsərrüfatının tələblərinə uyğun kadr hazırlığı, elmi tədqiqatların istehsalatla əlaqələndirilməsi və innovativ yanaşmaların tətbiqinin əsas prioritetlərdən olduğunu bildirib. O, 2026–2030-cu illəri əhatə edən kənd təsərrüfatının inkişafına dair Dövlət Proqramının aqrar sahəyə göstərilən diqqətin mühüm göstəricisi olduğunu qeyd edib. Zəfər Qurbanov cari ildə ADAU üzrə qəbul planının 100 faiz yerinə yetirildiyini bildirərək, bu göstəricinin gənclərin aqrar təhsilə marağının artdığını nümayiş etdirdiyini diqqətə çatdırıb.
Daha sonra Azərbaycan Dövlət Aqrar Universitetinin tanıtım çarxı nümayiş olunub.
Görüşdə iştirak edən AİB-in rəsmiləri – Hindistanın icraçı direktoru Satya Srinivas, Almaniyanın icraçı direktoru Helmut Fişer, Azərbaycan və Türkmənistan üzrə ölkə əməliyyatları rəhbəri Marina Best, Azərbaycanda ölkə direktoru Sunniya Durrani-Camal, ABŞ-nin alternativ icraçı direktoru Abiqeyl Demopulos və Yaponiyanın icraçı direktoru Şigeo Şimizu ADAU-da olmaqdan məmnunluqlarını ifadə edib, Azərbaycanın iqtisadi və kənd təsərrüfatı sahəsindəki inkişafını yüksək qiymətləndiriblər.
Maliyyə Nazirliyinin Beynəlxalq əlaqələr şöbəsinin müdir müavini Ramil Rəcəbovun da qatıldığı görüşdə aqrobiznesin inkişafı, məhsuldarlığın artırılması və universitetlə birgə layihələrin icrası ilə bağlı geniş fikir mübadiləsi aparılıb.
Sonda nümayəndə heyəti ADAU-nun İnnovasiyalar Mərkəzi, müasir laboratoriyaları və “ADAU TV” studiyası ilə yaxından tanış olub.