“Parisin sirrləri” silsiləsindən
Qeyri – Hökumət Təşkilatlarına Dövlət Dəstəyi Agentliyi 12 avqust 2026-cı il tarixdə özünün facebook səhifəsində “Ukrayna əsilli Azərbaycan qəhrəmanı Oleq Babakın xatirəsinə həsr olunan tədbirlər keçirilib” başlıqlı xəbər paylaşıb. Sevindirici xəbərdir. Amma… bəzi nüansları nəzərə alsaq bu, yaradıcı əməyə olan ən rişxənd xəbər, iş və əməllərdən biridir.
“Zəngəzur” Cəmiyyətləri İctimai Birliyi “Oleq Babak, Azərbaycan səni unutmayacaq!” layihəsinin icrasını başa çatdığı,layihənin məqsədinin milliyətcə ukraynalı olan Azərbaycan qəhrəmanı Oleq Babakın nümunəsində Azərbaycan və Ukrayna xalqları arasında dostluğun təbliği olduğunu, layihə çərçivəsində “Oleq Babak, Azərbaycan səni unutmayacaq!” adlı kitabın Azərbaycan və Ukrayna dillərində nəşr olunduğunu bildirib.
Paylaşımda həmçinin 2026-cı il iyunun 26-da layihə çərçivəsində Sumqayıtda müvəqqəti məskunlaşan Qubadlı rayonunun Yuxarı Cibikli kəndinin sakinləri ilə Ukrayna icmasının təmsilçilərinin “Sumqayıtdan Poltavaya könül körpüsü” mövzusunda görüşü olduğu qeyd olunur. 1991-ci il aprelin 7-də Qubadlının Ermənistanla həmsərhəd kəndi olan Yuxarı Cibiklidə erməni silahlı terrorçu dəstələrinin mühasirəsinə düşən sakinləri xilas etmək üçün döyüşə atılan 24 yaşlı leytenant Oleq Babakın xatirəsinə həsr edilən tədbirdə qəhrəmanın ömür yolundan danışılıb, döyüş yoluna həsr olunmuş “Oleq Babak, Azərbaycan səni unutmayacaq!” (“Олег Бабак, Азербайджан тебе не забуде!”) kitabı təqdim olunub.
Oleq Babakın Ukraynanın Poltava vilayətinin Piryatin rayonunun Viktoriya kəndində yaşayan anası Nadiya Babak tədbirə onlayn qatılaraq, təşkilatçılara təşəkkür edib.
Sonda iştirakçılara kitabın nüsxələri, elektron diskləri, Oleq Babakın ömür yolunu əks etdirən foto-albomlar hədiyyə edilib.
Layihə çərçivəsində həmçinin 2026-cı il mayın 20-də Oleq Babakın Ukraynanın Poltava vilayətinin Viktoriya kəndində yaşayan valideynlərinə, təhsil aldığı və onun adını daşıyan kənd məktəbində, Poltavadakı muzeyində, mayın 21-də Kiyevdə “Millətlərarası Harmoniya və Mədəni Müxtəliflik Günü” münasibətilə Ukraynanın Milli Azlıqları və Yerli Xalqlarının Ümumukrayna Forumunda təşkil olunan sərgidə, mayın 28-də isə Dnepropetrovsk şəhərində Ukrayna Azərbaycanlıları Konqresinin ofisində kitabın təqdimatı olub.
Layihənin donoru Azərbaycanın QHT-lərə Dövlət Dəstəyi Agentliyidir.
İş əlbəttə ki, sevindiricidir. Biz də özlüyümüzdə “Zəngəzur” Cəmiyyətləri İctimai Birliyin sədri Hacı Nərimanoğlunu təbrik edir, onun əvəzində də sevindiyimizi bildiririk. Bizim edə bilmədiyimiz qoçaqlığı o edib, Ukraynada patriotizm hisslərini oyada bilmədiyimiz rəsmi və qeyri-rəsmi azərbaycanlılarla görüşə bilib, onları maraqlandırıb, qəhrəmanın kəndində olub, onun anası və kənd ictimaiyyəti ilə görüşüb və onlara kitablar hədiyyə edib. Amma, bunu hansı yollarla edib, bu işə qol qoymazdan əvvəl hansı hissləri keçirib və bunu nə üçün edib?
Biz kitabla bağlı fikirlərimizi ona ünvanladığımız məktubda izhar etmişik. Təkrarçılıq olmasın deyə onu nəzərinizə çatdırırıq.
“Zəngəzur” Cəmiyyətləri İctimai Birliyin sədri Hacı Nərimanoğluna
Yazıçı-jurnalist, “Azərbaycanın Ukraynalı oğlu” kitabının müəllifi Ruhulla Zahidovdan
Hörmətli Nəriman bəy! Bu məktubu sizə yazmaq mənim üçün çox ağırdır. Mən də alim oğluyam və alim adını daşıyan insanın bu əməli düzü məni sarsıtdığı qədər də incidir. Sizin işıq ucu görən “Oleq Babak, Azərbaycan səni unutmayacaq!” kitabını nəşr etdirməyiniz təqdirəlayiq bir işdir. Alqışlayırıq. Düşünürük ki, bu kitab Ukrayna-Azərbaycan dostluğuna yeni çalarlar qatacaqdır. Amma, öz iradlarımı bildirməyə borcluyam. Bildirməliyəm ki, bu kitab əslində müəllifi olduğum “Azərbaycanın Ukraynalı oğlu” kitabının motivləri əsasında hazırlanmışdır. Oradakı materialların böyük əksəriyyəti də bu kitabdan götürülmüş, bəziləri müəyyən dəyişikliklərlə, bəziləri isə olduğu kimi sizin kitabda verilmişdir. Kitabın 59-cu səhifəsində isə ümumiyyətlə mənim şəkilimlə birlikdə bir səhifə yazım getmişdir. Özünüz də bilirsiniz ki, ədəbiyyatda nə köçürürsünüzsə onu istinadla vermək lazımdır. Peşəkar jurnalist və peşəkar nəşriyyatçı olduğumuz üçün kitabın süjet xəttindən onun necə tələm-tələsik hazırlandığını da bilirik. Bunu sizin kitaba nəzər yetirdikdə sezməmək mümkün deyil. Sizi buna vadar edən nə olmuşdur? Əgər siz ordan-burdan köçürüb kitab yazmaq istəyirsinizsə, bu sizin öz işinizdir. Amma sizin Ukraynada keçirdiyiniz görüşləri şəxsən mən –Ruhulla Zahidov etməli idi, o şöhrət neçə aylar materiallar toplayan mənə qismət olmalı idi, qəhrəmanın anası mənim yazdığım kitabı əlinə alıb sevinməli idi. İndi siz edibsiniz, halal xoşunuz olsun. Amma, bir şeyi deməyə də borcluyam: – Mən heç vaxt belə nasmərd iş görməzdim.
Yadınızdadırsa, haradasa bir il bundan əvvəl kimdənsə mənim telefon nömrəmi alıb mənə zəng etmişdiniz. Bildirdiniz ki, layihə çərçivəsində Qarabağa aid kitabların müsabiqəsi keçiriləcək. Oleq Babak haqqında yazdığım kitabı onlayn məndən istədiniz, mən göndərdim. Sonra mənimlə əlaqə saxlayaraq bu kitabın lazım olmadığını bildirdiniz. Onda başa düşdüm ki, burada nəsə qara işlər var, amma üz vurmadım. Bu kitab həmin layihədə iştirak etdi, ya başqasında, artıq əhəmiyyəti yoxdur. İş ondadır ki, siz əslində mənim zəhmətimdən bəhrələnmisiniz, mənə aid olan şöhrəti dolayısı yolla mənimsəmisiniz.
Bunu sübut etmək mənim üçün, peşəkar yazıçı üçün çətin iş deyildir. Allah xatirinə, nə vaxt istəsəniz debata çıxa, sizin alimə yaraşmayan hərəkətinizin ən iyrənc tərəflərini cəmiyyətə çatdırmağa hazıram.
Hörmətlə: Ruhulla Zahidov.