Gəncə şəhər Birləşmiş Xəstəxanasının rəhbərliyi dəyişəndə çox hörmət bəslədiyim bir jurnalist yazmışdı:- Ümid edirik ki, yeni müdir İlkin İsmayılovun işini ləyaqətlə davam etdirəcəkdir!
Həmin an düşündüm – Əgər bu müdir də onun yolunu davam etdirəcəksə, onda heç nə… Gəncədə fəaliyyət göstərən xəstəxana və poliklinikalarda həkim özbaşınıqlarından əzab çəkən, hər dəfə lüzumsuz təhqirlərlə rastlaşan, ah-naləri ərşə çıxan yazıq Gəncə camaatı və xəstələr. Gəncədə elə bir sahə yoxdur ki, səhiyyə sistemi kimi söyüşə, qarğışa, ah-naləyə qərq oluna bilsin. Bir vaxtlar insanların böyük hörmət və məhəbbətini qazanmış həkimlər sanki indi öz xalqının düşməninə çevrilmişlər.
Bir vaxtlar “2 nömrəli şəhər poliklinikasında bir günlük arayış neçəyədir? -Həkim səhvi, yoxsa məsuliyyətsizlik?!.” başlıqlı məqalə ilə çıxış etmişdim. Çünki, bu poliklinikada başımıza gələnlər bizi çox ağrıtmış, dəhşətə gətirmişdi. Başımıza gələnlər ilə bağlı kimlərə müraciət etmədik. Sanki, onlar canlı insanlar ilə deyil, hansısa ətlik bir heyvan sürüsü ilə iş görürdülər. Gəncə şəhər Birləşmiş Xəstəxanasının o vaxtkı direktoru İlkin İsmayılova başçılıq etdiyim Etmtv.space portalı adından rəsmi məktub ünvanladığımıza baxmayaraq, bu qurumdan bir cavab gəlmədi. İlkin İsmayılovun bizi şəxsən tanımağına rəğmən ondan daha ədalətli bir qərar gözləyirdik. Düşünürdük ki, bu adı çəkilən poliklinikada baş verənlərlə bağlı tədbir görülər, vətəndaşları incidən həkimlər heç olmasa danlanılar. Heyhat! Adı çəkilən poliklinikada nələrin baş verdiyi heç kimə sirr deyil. İnsan həyatının, insan sağlamlığının heç bir dəyər daşımadığı bir müəssisə. Ocaq yazmağa əlimiz gəlmədi, ocaq anlayışının bura üçün heç bir aidiyyatı yox. Bunu öz təcrübəmizdən bilirik. Baş həkim Xəyyam Əliyevi bura sanki, insanların əsəbləri ilə oynamaq, onları təhqir etmək, süründürmək üçün baş həkim təyin ediblər. İnsanlarda belə bir fikir formalaşıb ki, bu şəxsin özünə həkim lazımdır, çünki danışıqlarında, hərəkətlərində, əməllərində nəinki bir cinayət tərkibi, eləcə də psixi pozğunluq əlamətləri vardır və xəstələrlə davranışda bu hal özünü hər söhbətdə biruzə verir. Elə bir gün olmur ki, bu şəxs poliklinikaya müraciət edən xəstələr tərəfindən söyülməsin, ona qarğışlar edilməsin. Hətta xəstələr və onların yaxınları tərəfindən döyülməsin. Bunu sübut etmək çətin bir iş deyildir. Sadəcə onun kabinetinin qarşısında durub, xəstələrlə olan dava-dalaşları müşayiət etməyə dəyər.
Səhiyyə ocağı beləmi olmalıdır? Belə olmalıdırsa, onda Xəyyam həkim bu millətə düz edir və onun vəzifəsini daha da böyütmək lazımdır…
Bir həftə bundan öncə onun qəbuluna düşüb yarım il bundan əvvəl ona ünvanlanmış məktubun surətini təqdim etdik, düşündük ki, yəqin vaxtı olmadığını bəhanə gətirər, şikayətçini sakitləşdirməyə çalışar. Yenə də heyhat! Məktubu alar-almaz bizə kabineti tərk etməyimizi tələb etdi. Heç nə olmamış kimi otaqdan çıxdı və yanındakı ərəb-zəngiyə oxşar bir ağ xalatlıya bizi otaqdan çıxartmaq əmrini verdi.
Bu da bizim səhiyyə sistemimiz.
Qayıdaq 28 dekabr 2025-ci ildə Etmtv.space portalında dərc olunan məqaləyə. Adı çəkilən bu yazıdan bir müddət sonra 03 yanvar 2026-cı il tarixdə portalın adından Xəyyam Əlliyevə rəsmi məktub göndərilmiş, intizarla cavab gözləmişik. Baxmayaraq ki, cavab gəlməyib, yenə də səbrimizi basıb bu adamlarda nə vaxt vicdanın oyanacağını gözləmişik.
Indi vətəndaş nə fikirləşməli və nə etməlidir? Onun haqqında düşündüklərimizi həkimin vaçap nömrəsinə yazdığımız mesajda izhar etmişik. Onu sizlərə təqdim edirik:
“Bir daha xatırlatmağa məcburam ki, sizə ünvanladığım bu məktubun üstündən yarım ildən çox vaxt keçib. Səhiyyə İdarəsinə və şəxsən sizə ünvanladığım bu gileyə ( şikayət deməyə dilim gəlmədi) hələ də bir reaksiya olmayıb. Halbuki dərhal reaksiya verilməli idi və xəstədən üzrxahlıq istənilməli idi. Bir ailənin 3 üzvü sizin bu qeyri-insani hərəkətindən keçirici xəstəlikdən əziyyət çəkib, əzaba düçür olub.
Poliklinikada gördüklərimiz isə bizi dəhşətə gətirir. Burada nə dövlət qanunları, nədə ki, insani qanunlar işləmir. Çünki, siz özünüz insanlığınızı çoxdan itirmisiniz. Orada eşitdiyimiz ah-nalər, bizə olan münasibət yalnız bir qənaətə gəlməyə əsas verir – sizin özünüzə mütləq həkim lazımdır. Çünki, gördüyünüz işləri yalnız banditizm, bizə rast gələn kollektivinizi isə yalnız banda adlandırmaq olar və sizlər insan həyatı ilə oynamamalı, əslində türmədə cəza çəkməlisiniz. Ümid edirəm ki, bir qorxmaz adam tapılacaq və sizin layiqli cavabınızı verəcəkdir”.
P,S. Onu da qeyd etmək yerinə düşərdi ki, bu rəsmi məktub Gəncə şəhər Birləşmiş Xəstəxanasına göndərilməklə, həm də Gəncə şəhər Prokurorluğuna da təqdim edilmişdir.
Ruhulla Zahidov, yazıçı-jurnalist.