Tanınmış yazıçı, jurnalist Ruhulla zahidov Gəncənin İcra Başçısı Niyazi Bayrama Mətbuat Günü münasibətil məktub ünvanlayıb.
Onu olduğu kimi sizlərə təqdim edirik.
Düşünürük ki, bu müraciətimiz hörmətlə qarşılanacaqdır.
Gəncə Şəhər İcra Hakimiyyətinin başçısı
Niyazi Bayramova
“23” iyul 2026-cı il
Müraciət
Hörmətli Niyazi müəllim!
Bu müraciəti Sizə yazıçı-jurnalist Ruhulla Zahidov edir. Bildirməyə borcluyam ki, mən peşəkar jurnalist, yazıçılıq fəaliyyətim ilə on illər ərzində cəmiyyətin xüsusi hörmət və ehtiramını qazanmış bir insanam. Həmişə dövlətimə və xalqıma xüsusi sevgi və xidmətlərim ilə seçilən bir insan olmuşam. Tam səmimiyyətlə deyə bilərəm ki, həyatımın elə illəri olub ki, bir şəhərin jurnalistlərindən çox iş görmüşəm və bu işləri bütün Azərbaycan izləyərək alqışlayıb.
Jurnalistika xüsusi istedad və bacarıq tələb edən bir sahədir. Çalışmışıq ki, bu sahəni işimizlə ləyaqətlə təmsil edək. Bildirim ki, sovet quruluşu dağılandan bəri Gəncə şəhərində bir dəfə də olsun iş ala bilməmişəm. Baxmayaraq ki, sovet illərində belə dövlət qəzetində çalışmışam və o vaxt işlətmək üçün heç peşəkar, diplomlu jurnalist tapa bilmirdilər, birdən – birə bu sahədə ən yüksək vəzifələrdə çalışan çoxlu sayda yalançı jurnalistlər peyda oldu. Belə şeylərin necə baş verdiyini siz bizlərdən də yaxşı bilirsiniz. Bu illər ərzində onların əlindən nələr çəkdiyimizi bir allah bilir. Çünki, bəndələrin heç vecinə də deyilik. İndi də xüsusilə. Hələ ki, gördüyümüz heç bir işə bir dövlət strukturu tərəfindən layiqli qiymət verilməyib. Sanki biz bu şəhərin övladı deyilik və hardasa Afrikanın banan dövlətlərinin vətəndaşlarıyıq. Bizə olan bu münasibətə elmi dildə rasizm və faşizm deyilir. Ayrı – seçkilik, görkəmli şəxslərin bu yolla sanki qəsdən alçaldılması deməkdir. Şəxsən mən bu bu münasibətdən cana doymuşam, artıq bu şəhər üçün heç bir iş görmək istəmirəm. Qoy hər Mətbuat Günündə xüsusi hörmət və ehtirama layiq görülən, çoxunun heç jurnalistika ilə əlaqəsi olmayan insanlar bizim yerimizi tutduqları üçün xəcalət çəksinlər. Çünki, illərlə bizlər acından ölməyə məhkum edilmişik, səfalətə, işsizliyə düçar olmuşuq, böyük xidmətlərimizə baxmayaraq öz layiqli yerimizi tuta bilməmişik. Bunda günahkar kimdir? Biz öz həyatımızla dövlətimiz və xalqımız üçün əlimizdən gələni etmişik və illərlə elə sizin də təbliğatçınız olmuşuq.
Hər il Mətbuat Günündə bizim də icra aparatına dəvət edilməsini gözləyirik. Heyhat, Kür çayı Gəncə üzərindən keçib gedər, amma şəxsən mənə bir insani münasibət göstərilməz. Elə sizə də dəfələrlə müraciət etməyimizə baxmayaraq hələ ki, bir xoş münasibət görməmişik. Heç gözləmirik də. Çünki, bütün bunların təsadüfi olmadığını bilirik. Biz Afrikadan gəlmişik və… insan deyilik. Başa düşürük.
Xahiş olunur bir dəfə də özünüzü Azərbaycan vətəndaşı kimi hiss edin və yazarın müraciətini icra aparatının rasist saydığımız əməkdaşlarına həvalə etməyin.
Sizə cəsarətlə sual ünvanlayırıq:
-Bizim jurnalistikada və cəmiyyət qarşısında xidmətlərimiz niyə Gəncə şəhəri İcra Hakimiyyəti tərəfindən qəbul olunmur? Buna səbəb nədir?
-Hər il Mətbuat Günündə sizin tərəfinizdən hörmətə və ehtirama layiq görülən jurnalistlərin bizdən nə üstünlüyü və xidmətləri vardır? Bu siyahını kim tutur? Bizlər niyə o siyahıya əlavə edilmirik?
-Bizim gördüyümüz nəhəng işlər niyə təqdirəlayiq sayılmır? Axı bu işlər dövlətimizin və xalqımızın ucalığı naminə edilmişdir.
Ümid edirik ki, məktubumuzda qeyd olunanlar hörmətlə qarşılanacaqdır.
Hörmətlə: Ruhulla Zahidov, yazıçı-jurnalist,
Etmtv. space təhsil portalının təsisçisi və baş redaktoru.