15 iyul 2026-cı il tarixində Xalq artisti Sədayə Mustafayevanın anadan olmasının 100 ili tamam olur
Azərbaycan teatr və kino sənətinin görkəmli nümayəndəsi, Xalq artisti Sədayə İsmayıl qızı Mustafayevanın anadan olmasının 100 illiyi tamam olur. Ömrünü milli səhnə sənətinin inkişafına həsr edən sənətkar yaratdığı parlaq obrazlarla Azərbaycan mədəniyyəti tarixində özünəməxsus yer tutub.
Sədayə Mustafayeva 1926-cı il iyulun 15-də Şəki şəhərində anadan olub. Əmək fəaliyyətinə İkinci Dünya müharibəsi illərində başlasa da, qısa müddət sonra taleyini teatr sənəti ilə bağlayıb. Yaradıcılığa Şəki Dövlət Dram Teatrında başlayan aktrisa sonralar Ağdaş, Göyçay və uzun illər Gəncə Dövlət Milli Dram Teatrında fəaliyyət göstərərək milli teatr səhnəsində yüzlərlə yaddaqalan obrazlar yaradıb.
Sədayə Mustafayeva təkcə teatr səhnəsində deyil, Azərbaycan kinosunda da uğurlu fəaliyyəti ilə tanınıb. O, “Mən ki gözəl deyildim”,”Qanun naminə”, “Şərikli çörək”, “Ağ atlı oğlan”, “Şəhər bicinciləri”, “Qaynana”, “Ölsəm, bağışla”, “Həm ziyarət, həm ticarət” və digər 20 artıq filmlərdə yaratdığı obrazlarla tamaşaçıların yaddaşında silinməz iz buraxıb. Səmimi oyun üslubu, obrazların daxili aləmini incəliklə açmaq bacarığı onu sevilən aktrisalardan birinə çevirib.
Sənətkarın Azərbaycan mədəniyyətinin inkişafındakı xidmətləri dövlət tərəfindən yüksək qiymətləndirilib. O, 1958-ci ildə “Əməkdar artist”, 1981-ci ildə isə “Xalq artisti” fəxri adına layiq görülüb. 2003-cü ildə Azərbaycan Respublikası Prezidentinin fərdi təqaüdü ilə təltif edilib.
Sədayə Mustafayeva 2004-cü il avqustun 13-də Gəncə şəhərində vəfat etsə də, onun zəngin yaradıcılıq irsi bu gün də yaşayır. Anadan olmasının 100 illiyi münasibətilə Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə “Sənətə həsr olunmuş ömür” adlı yubiley tədbiri keçirilib, sənətkarın teatr və kino irsi bir daha ehtiramla yad edilib.
Xalq artisti Sədayə Mustafayevanın 100 illik yubileyi Azərbaycan teatr və kino sənətinin görkəmli nümayəndələrindən birinin zəngin irsini xatırlamaq, onun milli mədəniyyətimizə bəxş etdiyi dəyərli töhfələri gələcək nəsillərə çatdırmaq baxımından mühüm əhəmiyyət daşıyır.