Azərbaycan Dövlət Aqrar Universitetində (ADAU) Qərbi Azərbaycan İcmasının (QAİ) Gəncə nümayəndəliyi ilə birgə yazıçı-publisist Binnət Əsgərovun “Maqadan: sonuncu dayanacaq” kitabının təqdimat mərasimi keçirilib.
Tədbirdə Qərbi Azərbaycan İcmasının Gəncə bölməsinin üzvləri, şəhər ziyalıları, elm adamları və ictimai xadimlər iştirak ediblər.
Əvvəlcə Ulu Öndər Heydər Əliyevin şəhərin mərkəzi meydanında yerləşən abidəsini ziyarət edərək, önünə tər güllər düzüb, Dahi Öndərin əziz xatirəsini dərin ehtiramla yad ediblər.
Tədbir Ümummilli Lider Heydər Əliyevin və torpaqlarımızın ərazi bütövlüyü uğrunda şəhid olan qəhrəmanların xatirəsinin bir dəqiqəlik sükutla yad edilməsi ilə başlanıb. Sonra Dövlət Himni səsləndirilib.
Təqdimat mərasimində çıxış edən ADAU-nun Tədrisin təşkili və təlim texnologiyaları üzrə prorektoru Əhməd Məlikov “Maqadan: sonuncu dayanacaq” kitabını Azərbaycan tarixinin faciəli səhifələrinin öyrənilməsi baxımından mühüm nəşr kimi dəyərləndirib. Prorektor müəllifin uzunmüddətli araşdırmalar əsasında ərsəyə gətirdiyi bu kitabın Sovet repressiyalarının acı həqiqətlərinin işıqlandırılması istiqamətində atılan uğurlu və təqdirəlayiq addım olduğunu qeyd edərək, tarixi faktlara söykənən belə nəşrlərin cəmiyyətin tarixi hadisələrə obyektiv yanaşmasının formalaşmasında, milli yaddaşın yaşadılmasında xüsusi əhəmiyyət daşıdığını bildirib.
Qərbi Azərbaycan İcması İdarə Heyətinin üzvü, Gəncə Dövlət Universitetinin dosenti Bayram Apoyev, Qərbi Azərbaycan İcmasının Gəncə bölməsinin üzvləri, ADAU-nun Epizootologiya, mikrobiologiya və parazitologiya kafedrasının müdiri Zahir Ələsgərov, Ümumi əkinçilik, genetika və seleksiya kafedrasının müdiri Aynur Həsənova repressiyaların insan taleyində buraxdığı dərin izlərdən bəhs ediblər. Onlar kitabın yalnız tarixi araşdırma deyil, həm də milli yaddaşın qorunmasına xidmət edən mühüm nəşr olduğunu diqqətə çatdırıblar.
Qərbi Azərbaycan İcmasının Gəncə bölməsinin üzvləri, Gəncə Dövlət Universitetinin dosenti Arifə Əhmədli və Nazim Cahangirov da çıxış edərək Azərbaycan xalqının çoxsaylı görkəmli ziyalılarının və elm adamlarının totalitar rejimin qurbanına çevrildiyini bildiriblər.
Sonda kitabın müəllifi Binnət Əsgərov çıxış edərək nəşrin əsas məqsədinin Sovet repressiyalarının qurbanı olan azərbaycanlıların taleyini işıqlandırmaq, onların xatirəsini yaşatmaq və tarixi həqiqətləri gələcək nəsillərə çatdırmaq olduğunu qeyd edib.
Tədbirin sonunda Binnət Əsgərov müəllifi olduğu kitabları ADAU-nun Kitabxana və İnformasiya Mərkəzinə hədiyyə edib.
