Gəncə şəhərində 5 Mart – Bədən Tərbiyəsi və İdman Günü münasibətilə tədbir təşkil olunub. Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, Gəncə-Daşkəsən Regional Gənclər və İdman İdarəsinin rəisi Elşən Hüseynov, idarə, müəssisə və təşkilat rəhbərləri, həmçinin şəhərin idman ictimaiyyətinin nümayəndələri iştirak ediblər.
Tədbir iştirakçıları əvvəlcə şəhərin Mərkəzi meydanında Ulu Öndər Heydər Əliyevin abidəsini ziyarət edərək önünə gül dəstələri düzüb, dahi şəxsiyyətin xatirəsinə ehtiramlarını bildiriblər.
Daha sonra rəsmi hissə başlayıb. Ulu Öndər Heydər Əliyevin, eləcə də Azərbaycanın müstəqilliyi, ərazi bütövlüyü və suverenliyi uğrunda canından keçmiş şəhidlərin xatirəsi bir dəqiqəlik sükutla yad edilib. Ardınca hərbi orkestrin ifasında Azərbaycan Respublikasının Dövlət Himni səsləndirilib.
Gəncə Şəhər İcra Hakimiyyətinin başçısı Niyazi Bayramov çıxış edərək bildirib ki, Azərbaycanda idmanın inkişafı dövlət siyasətinin prioritet istiqamətlərindən biridir. O qeyd edib ki, ölkə Prezidenti tərəfindən idman sahəsinə göstərilən diqqət və qayğı nəticəsində Azərbaycan idmançıları beynəlxalq arenalarda böyük uğurlara imza atırlar. Niyazi Bayramov Gəncə idmançılarının da ölkənin idman həyatında fəal rol oynadığını vurğulayaraq onlara gələcək yarışlarda yeni nailiyyətlər arzulayıb.
YAP Gəncə şəhər təşkilatının sədri Bayram Aslanov çıxışında gənclərin sağlam ruhda yetişməsində idmanın mühüm rol oynadığını qeyd edib. O bildirib ki, idman gənclərin vətənpərvərlik ruhunda formalaşmasına, onların sağlam və güclü böyüməsinə böyük töhfə verir. Bayram Aslanov Gəncədə idman ənənələrinin güclü olduğunu vurğulayaraq idmançılara uğurlar arzulayıb.
Türkiyənin Gəncə şəhərindəki Baş konsulu Recep Öztop çıxış edərək Azərbaycan və Türkiyə arasında mövcud olan qardaşlıq münasibətlərindən danışıb. O qeyd edib ki, idman xalqlar arasında dostluğun və əməkdaşlığın möhkəmlənməsində mühüm rol oynayır. Baş konsul Azərbaycan idmançılarının beynəlxalq yarışlarda qazandığı uğurları yüksək qiymətləndirərək Gəncə idmançılarına yeni nailiyyətlər arzulayıb.
Gəncə-Daşkəsən Regional Gənclər və İdman İdarəsinin rəisi Elşən Hüseynov isə çıxışında regionda idmanın inkişafı istiqamətində görülən işlərdən danışıb. O qeyd edib ki, son illər bölgədə idman infrastrukturu genişlənib, gənclərin müxtəlif idman növlərinə marağı xeyli artıb. Elşən Hüseynov idmançıların qazandığı nailiyyətlərin region üçün böyük qürur mənbəyi olduğunu bildirib.
Tədbir çərçivəsində 2025-ci il ərzində idman sahəsində yüksək nəticələr əldə etmiş bir qrup idmançı “Təşəkkürnamə” ilə təltif olunub.
Rəsmi hissədən sonra tədbir bədii proqramla davam edib. İdmançılar tərəfindən güləş, aykido, karate, kikboksinq və gimnastika idman növləri üzrə nümunəvi çıxışlar nümayiş etdirilib.
Daha sonra F. Əmirov adına Gəncə Dövlət Filarmoniyasının Rəqs Ansamblı “Bayram suitası” və “Dağlı rəqsi” ilə çıxış edib. Konsert proqramında filarmoniyanın solistləri Rüstəm Cəfərov, Rövşən Məmmədov, eləcə də Əməkdar mədəniyyət işçisi Məhbarə Cəfərova və Əməkdar artist Tural İbrahimov tərəfindən vətənpərvər və sevilən mahnılar ifa olunub.
Bayram əhval-ruhiyyəsində keçən tədbir iştirakçılar tərəfindən böyük maraq və alqışlarla qarşılanıb.
