May ayının 27-də Gəncə Şəhər İcra Hakimiyyətinin dəstəyi, Yeni Azərbaycan Partiyasının Veteranlar Şurası və YAP Gəncə şəhər təşkilatının birgə təşkilatçılığı ilə “28 May: Azərbaycan dövlətçilik tarixinin şanlı səhifəsi” mövzusunda dəyirmi masa keçirilib.
Heydər Əliyev Mərkəzində həyata keçirilən dəyirmi masada YAP İdarə Heyətinin üzvü, Veteranlar Şurasının sədri Arif Rəhimzadə, Veteranlar Şurasının üzvü tarix elmləri doktoru Dilarə Seyidzadə, Gəncə Şəhər İcra Hakimiyyətinin başçısı Niyazi Bayramov, YAP Mərkəzi Aparatının şöbə müdiri Rufiz Qonaqov, şöbə müdiri əvəzi Zəkiyyə Musayeva, YAP Gəncə şəhər təşkilatının sədri Ramil Orucov, Türkiyənin Gəncədəki Baş konsulu Zeki Öztürk, Gəncə-Daşkəsən, Qazax-Tovuz iqtisadi rayonları üzrə partiya fəalları, tarixçi alimlər, tədqiqatçılar və kütləvi informasiya vasitələrinin nümayəndələri iştirak ediblər.
Tədbir iştirakçıları əvvəlcə Şəhidlər xiyabanına gəlib, Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarlarını ziyarət ediblər. Daha sonra qonaqlar müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin abidəsini ziyarət edib, önünə gül dəstələri düzüblər.
Azərbaycan Respublikasının Dövlət Himninin səsləndirilməsi ilə başlanan tədbirdə ulu öndər Heydər Əliyevin, ölkəmizin müstəqilliyi və ərazi bütövlüyü uğrunda canlarını qurban verən şəhidlərimizin əziz xatirəsi bir dəqiqəlik sükutla yad edilib.
İştirakçıları salamlayan YAP Gəncə şəhər təşkilatının sədri Ramil Orucov tədbirin işinə uğurlar arzu edib.
YAP İdarə Heyətinin üzvü, YAP Veteranlar Şurasının sədri Arif Rəhimzadənin moderatorluğu ilə keçən tədbirdə Gəncə Şəhər İcra Hakimiyyətinin başçısı Niyazi Bayramov “Qədim Gəncə: Azərbaycan Xalq Cümhuriyyətinin ilk paytaxtı” mövzusunda çıxış edərək, Azərbaycan Xalq Cümhuriyyətinin üç ay ərzində Gəncədəki fəaliyyəti tariximizin və dövlətçiliyimizin şanlı səhifələrinə yazıldığını qeyd edib:
“Cümhuriyyət tarixinin ən məhsuldar dövrü Gəncədə yaşanıb. Üç ay ərzində Gəncədə xalqın taleyi ilə bağlı yüzdən artıq qanun və qərar qəbul edilib, Azərbaycan dili dövlət dili elan olunub. İlk dəfə al qırmızı ay-ulduzlu bayrağımız Gəncədə ucaldılıb. Azərbaycan Milli Ordusunun təşkili sahəsində ilk addımlar da Gəncədə atılıb”,-deyə Niyazi Bayramov qeyd edib.
Zeki Öztürk “Azərbaycan-Türkiyə qardaşlığı əbədi və sarsılmazdır” mövzusunda çıxış edərək bildirib ki, Türkiyə ilə Azərbaycan eyni dildə danışan, eyni əqidəyə mənsub, sözdə deyil, ortaq tarixi keçmişi paylaşan iki qardaş xalqdır. Bu baxımdan xalqlarımızın ortaq tarixi, milli-mənəvi dəyərləri kimi möhkəm təməllər üzərində dayanan Azərbaycan-Türkiyə qardaşlıq münasibətləri bizim birlik və həmrəyliyimizin bariz göstəricisidir. Zəki Öztürk xüsusi olaraq bildirib ki, dünyada Azərbaycan və Türkiyə qədər bir-birinə yaxın ölkələr yoxdur.
Tədbirdə Dilarə Seyidzadə “Azərbaycan XX əsrin əvvəllərində: Müstəqilliyə aparan yollar”, Asim Məmmədov “Azərbaycan Xalq Çümhuriyyəti Şərqin ilk demokratik dövlətidir”, Rufiz Qonaqov “Azərbaycan Xalq Cümhuriyyətinin siyasi varisi olan müstəqil Azərbaycan bu gün Bölgədə yeni konfiqurasiya və yeni reallıqlar” mövzularında çıxış ediblər.
Dəyirmi masa mövzu ətrafında müzakirələrlə davam edib.
Tədbirdən sonra qonaqlar Gəncə Dövlət Dram Teatrının yeni binasında olublar. Teatrın direktoru Aqil Bəhramlı qonaqları salamlayaraq yeni binada yaradılan şərait haqqında məlumat verib.
