27 Sentyabr – Azərbaycanın ərazi bütövlüyü və suverenliyi uğrunda canlarından keçən şəhidlərimizin əziz xatirəsinin ehtiramla yad edildiyi gündür.
2020-ci il sentyabrın 27-də Ermənistan silahlı qüvvələrinin genişmiqyaslı təxribatına cavab olaraq Azərbaycan Ordusu əks-hücum əməliyyatına başladı. 44 gün davam edən Vətən müharibəsi Azərbaycanın tarixi Zəfəri ilə nəticələndi.
Döyüş meydanında əldə olunan qələbə nəticəsində Cəbrayıl, Füzuli, Zəngilan, Qubadlı rayonları və Şuşa şəhəri işğaldan azad edildi. 10 noyabr 2020-ci il tarixli üçtərəfli Bəyanata əsasən, Ağdam, Kəlbəcər və Laçın rayonları da Azərbaycana qaytarıldı.
2023-cü il sentyabrın 19–20-də Qarabağda həyata keçirilən lokal xarakterli antiterror tədbirləri nəticəsində Azərbaycanın bütün ərazisində konstitusiya quruluşu bərpa edildi və dövlət suverenliyi tam təmin olundu.
Qarabağ məsələsinin həlli hərbi müstəvi ilə yanaşı, siyasi müstəvidə də davam etdirildi. 8 avqust 2025-ci ildə Vaşinqtonda Azərbaycan və Ermənistan sülhə dair saziş layihəsini parafladılar.
Prezident İlham Əliyevin 2 dekabr 2020-ci il tarixli Sərəncamı ilə sentyabrın 27-si Azərbaycanda Anım Günü elan edilib.
Bu əlamətdar gündə Azərbaycanın ərazi bütövlüyü və suverenliyi uğrunda canlarından keçən bütün şəhidlərimizin əziz xatirəsini dərin ehtiram və sonsuz minnətdarlıqla yad edirik.
Allah bütün şəhidlərimizə rəhmət eləsin!