22 İyul – Milli Mətbuat Günü münasibətilə Gəncə Şəhər İcra Hakimiyyətinin başçısı Niyazi Bayramov Qərb bölgəsində fəaliyyət göstərən media nümayəndələri ilə görüşüb, onların şərəfinə ziyafət təşkil olunub.
Şəhər rəhbəri çıxışında bildirib ki, Ümummilli Lider Heydər Əliyev demokratik cəmiyyətin qurulmasında mətbuatın roluna hər zaman xüsusi önəm verib, senzuranın ləğvi və medianın azad, müstəqil fəaliyyət göstərməsi üçün mühüm addımlar atıb. Qeyd olunub ki, Ulu Öndərin müəyyən etdiyi dövlət-media münasibətləri bu gün Prezident İlham Əliyevin rəhbərliyi ilə uğurla davam etdirilir, medianın inkişafı istiqamətində ardıcıl islahatlar həyata keçirilir.
Niyazi Bayramov media nümayəndələrini peşə bayramı münasibətilə təbrik edərək onlara fəaliyyətlərində uğurlar arzulayıb. O, cəmiyyətin düzgün məlumatlandırılması, milli maraqların qorunması və dövlətçilik dəyərlərinin təbliğində jurnalistlərin mühüm rol oynadığını vurğulayıb, onların əməyini yüksək qiymətləndirib.
Media nümayəndələri də çıxış edərək ölkədə mətbuatın inkişafına göstərilən dövlət qayğısına görə minnətdarlıqlarını bildiriblər və yaradılan şəraitin peşəkar jurnalistikanın inkişafına mühüm töhfə verdiyini qeyd ediblər.
Tədbirin sonunda xatirə şəkli çəkdirilib.
Qeyd edək ki, Azərbaycanda milli mətbuatın əsası Həsən bəy Zərdabinin təşəbbüsü ilə 1875-ci il iyulun 22-də nəşrə başlayan “Əkinçi” qəzeti ilə qoyulub. Bu əlamətdar tarix 1991-ci ildən etibarən ölkəmizdə Milli Mətbuat Günü kimi qeyd olunur.
Mənbə: PatriotNews.com.az
