Gəncədə insan alverinə qarşı mübarizəyə həsr olunmuş maarifləndirici tədbir keçirilib

Tədbir Daxili İşlər Nazirliyi və Dövlət Turizm Agentliyinin birgə təşkilatçılığı ilə “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nın müvafiq bəndələrinin icrasının təmin edilməsi məqsədilə keçirilib.

Toplantıda İnsan Alverinə Qarşı Mübarizə Baş İdarəsinin, Gəncə Regional Turizm İdarəsinin, Gəncə Şəhər İcra Hakimiyyətinin, Gəncə Regional Miqrasiya İdarəsinin rəsmiləri və qərb bölgəsində fəaliyyət göstərən yerləşmə müəssisələrinin nümayəndələri iştirak ediblər.

Gəncə Regional Turizm İdarəsinin rəisi Zaur Bayramov öz çıxışında mövzunun aktuallığını qeyd edib və sənaye üzvlərinin mövzu ətrafında davamlı maarifləndirilməsinə böyük ehtiyacın olduğunu bildirib.

İnsan Alverinə Qarşı Mübarizə Baş İdarəsinin əməkdaşları Vamiq Naməndzadə və Mahir İsrafilov öz çıxışlarında “İnsan alverinə qarşı mübarizə haqqında” Azərbaycan Respublikasının Qanununa, o cümlədən digər normativ hüquqi sənədlərə, sərəncamlara və aktlara istinad edərək iştirakçılara geniş məlumat verərək , real nümunələr üzərindən praktiki fikir mübadiləsi aparıblar.

Gəncə Regional Miqrasiya İdarəsinin inspektoru Rövşən Səfərli də çıxış edərək yerləşmə müəssisələrində miqrasiya ilə bağlı qeydiyyatın düzgün aparılması, müvafiq dövlət orqanlarına vaxtında məlumatların verilməsinin vacibliyini vurğulayıb.

Daha sonra mövzu ətrafında geniş müzakirələr aparılıb, turizm sənaye üzvlərinin müvafiq sualları cavablandırılıb.