Gəncə Şəhər Tibb Kollecində 28 May – Müstəqillik Gününün 108-ci ildönümü münasibətilə “28 May Müstəqillik Günü – xalqımızın milli qürur və birliyinin simvoludur” mövzusunda təntənəli tədbir keçirilib.
Tədbir Azərbaycan Respublikasının Dövlət Himninin səsləndirilməsi və Ulu Öndər Heydər Əliyevin, eləcə də Vətənimizin bütövlüyü uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə açıq elan olunub.
Tədbiri giriş sözü ilə Gəncə Tibb Kollecinin direktoru,əməkdar həkim Mehman Rzayev açaraq iştirakçıları salamlayıb və 28 May – Müstəqillik Gününün Azərbaycan xalqının milli dövlətçilik tarixində mühüm yer tutduğunu bildirib. O qeyd edib ki, 1918-ci ildə yaradılan Azərbaycan Xalq Cümhuriyyəti xalqımızın azadlıq və müstəqillik iradəsinin ən parlaq təzahürüdür.
Mehman Rzayev çıxışında Ulu Öndər Heydər Əliyevin müstəsna xidmətlərini xüsusi vurğulayaraq bildirib ki, onun uzaqgörən siyasəti nəticəsində Azərbaycan müstəqilliyini qoruyub saxlayaraq güclü dövlətə çevrilib. O həmçinin Prezident, Ali Baş Komandan İlham Əliyevin rəhbərliyi ilə ölkəmizin inkişaf etdiyini, suverenliyimizin tam təmin olunduğunu və Azərbaycanın beynəlxalq aləmdə nüfuzunun daha da artdığını qeyd edib.
Tədbirdə çıxış edən Qarabağ Qaziləri İctimai Birliyinin Gəncə filialının sədri Eyvaz Hüseynov Müstəqillik Gününün xalqımız üçün böyük qürur və birlik rəmzi olduğunu bildirib. O qeyd edib ki, Ulu Öndər Heydər Əliyevin əsasını qoyduğu dövlətçilik siyasəti bu gün Prezident İlham Əliyev tərəfindən uğurla davam etdirilir və Vətən müharibəsində qazanılan tarixi Zəfər xalqımızın birliyinin təntənəsidir.
Həmçinin tədbirdə 28 May – Müstəqillik Günü və Qurban bayramı münasibətilə Gəncə Tibb Kollecinin direktoru ,əməkdar həkim Mehman Rzayev Qarabag Qaziləri İctimai Birliyinin Gəncə filialının sədri Eyvaz Hüseynov tərəfindən “Təşəkkürnamə” ilə təltif olunub.
Digər çıxış edənlər də müstəqilliyimizin qorunmasının hər bir vətəndaşın müqəddəs borcu olduğunu vurğulayaraq gənclərin vətənpərvərlik ruhunda yetişdirilməsinin vacibliyindən danışıblar.
Tədbirin sonunda iştirakçılarla birlikdə xatirə şəkli çəkdirilib.
Mənbə: Patriot News.com.az
