Vətənpərvərlik ictimai hissdir, vətəninə bağlılıq, ona sədaqət, onun uğrunda hər an özünü qurban verməyə hazır olmaq, xalqına, onun adət-ənənələrinə şüurlu məhəbbətdir. Vətənpərvərlik öz vətəninin nailiyyətləri və mədəniyyəti ilə fəxr etməkdir. Vətənpərvər insan vətənin və öz xalqının mənafeyini daim qorumaq arzusu ilə yaşayır.
Vətənpərvərliyin tarixi mənbəyi əsrlər, minilliklər boyu qurulmuş və doğma torpağa, dilə, adət-ənənələrə bağlılığı formalaşdıran yenilməz hissdir. Bu səbəbdən vətənpərvərlik haqqında ideyalar əsrlər boyu yalnız vətənə məhəbbətlə bağlı olmuşdur.
Vətənpərvər davranış xalqın ümumi mənafeyinə vicdanla, şüurlu şəkildə xidmət etməyi, doğma xalqla ruhən bir olmağı, milli mənafeləri ön plana çıxarmağı və şəxsi mənafeyini bir-birinə zidd qoymadan onlarla birlikdə həll etməyi nəzərdə tutur. Vətənpərvərlik insanların şəxsi mənafeyindən daha əhəmiyyətli bir hal olmaqla ümumi mənafeyə xidmət etməkdir. Vətənpərvərlik həm də kritik vəziyyətlərdə vətənin qorunması naminə cəmiyyəti birliyə çağıran bir hissdir. Məhz bu cür vətənpərvərlik cəmiyyətin və dövlətin vəhdət şəklində maraqlarının ifadəçisi rolunda çıxış edir. Biz buna 44 günlük Vətən müharibəsi dövründə şahid olduq. Vətənimizə və dövlətimizə məhəbbət və sədaqət, vətənpərvərliyin ən yüksək formasıdır!
Şübhəsiz ki, vətənpərvərlik və hərbi-vətənpərvərlik tərbiyəsi ölkəmiz üçün həmişə aktual məsələ olaraq qalacaqdır. Bu, xalqı və hər bir insanı ölkənin həyatına cavabdeh edən hissdir. Vətənpərvərlik olmasa belə bir məsuliyyət yoxdur. Əgər kimsə öz xalqını düşünmürsə, deməli, onun evi, kökü yoxdur. Və belə bir insan evsiz insanla eynidir. Bu mənada vətənpərvərlik bəşəri hisslərlə uzlaşır.
Hesab edirəm ki, bu gün vətənpərvərlərin əsas vəzifəsi ölkəmizi qorumaq, onu çiçəkləndirmək, onu xoşbəxt gələcəyə aparmaqdır.
Respublikamızda vətənpərvərlik və hərbi – vətənpərvərlik tərbiyəsi sistemi dövlət xarakteri daşıyan bir işdir. Bu tərbiyə təhsilin bütün sahələrində həyata keçirilir. Təhsil sistemimiz vətənpərvərlik hisslərinin gənc nəslə aşılanması yolunda aparıcı qüvvədir və bu işə bütün var gücünü həsr edir. Məktəblilərdə vətənpərvərlik hissinin formalaşdırılması vətənpərvərlik tərbiyəsi üzrə sistem halını almış təlim – tərbiyə prosesi, ictimai-siyasi işlər, milli-mənəvi ruhu özündə daşıyan dövlət bayramları, uşaqların hərbi-vətənpərvərlik tərbiyəsinin formalaşmasında böyük rol oynayan ictimai təşkilatların işi və s. vasitəsilə həyata keçirilir. Bu iş ali təhsil ocaqlarında da davam etdirilərək, özünün pik həddinə çatır. Bu hisslər gənclərimizin damarlarına hopdurulur, onlar vətənimizin layiqli övladları kimi yetişdirilir. Bu gün Azərbaycanda vətənpərvərlik anlayışı fəal şəkildə populyarlıq qazanmışdır. Əlbəttə ki, bu işdə biz təhsil işçilərin əməyi böyükdür.
Vətənpərvərlik tərbiyəsi dövlət və təhsil siyasətinin prioritet istiqamətinə çevrilmişdir. Bunu son illərdə qəbul edilmiş qanunlar sübut edir. Təhsil sistemində vətənpərvərlik hisslərinin qorunub saxlanılmasını təmin etmək üçün çoxlu sayda proqramlar və digər sənədlər nəzərdə tutulmuşdur. Bu sənəd və proqramlar həm də milli mədəniyyətimizin inkişafı, ölkənin tarixi-mədəni irsinə qayğıkeş münasibətin tərbiyəsi, fərdi hüquq və azadlıqlara hörmət və s. özündə ehtiva edir. Çünki vətənpərvərlik tərbiyəsi həm də dəyərlərə məhəbbət, dövlətimizə və vətənimizin gələcəyinə inam yaratmaq deməkdir. Günümüzdə vətənpərvərlik tərbiyəsi mənəvi və əxlaqi dəyərlərin əsasının qorunması və inkişafına xidmət etməkdədir.
Bu işdə qəhrəmanlarımız, şəhid və qazilərimiz haqqında yazılan kitablar və ədəbiyyəat nümunələri, filmlər də çox böyük rol oynamaqdadır. Onlar xalqımızın qəhrəman oğul və qızlarının həyatı və döyüş yolunu dolğunluğu ilə gənc nəslə çatdıran ən gözəl tərbiyəvi vasitələrdən biri, milli təhsilimizdə mənəvi, idrak və sosial faydalı yönümlü yüksək motivasiyalı fəaliyyətin həyata keçirilməsində faydalı üsullardandır. Bu kitablar dövlət maraqlarını və oxucuların mənəvi ehtiyaclarını nəzərə almaqla yazılmalı və geniş oxucu kütləsinə təqdim olunmalıdır. Bu kitablar vətənpərvərlik tərbiyəsinin əsas istiqamətlərini özündə daşıyır və gənc nəslin təlim-tərbiyəsində böyük rol oynamaqdadır.
Pərvin Kərimzadə, GDU-nun Elm və innovasiyalar üzrə prorektoru,
tarix elmləri namizədi, dosent, Millət vəkili.