Daxili İşlər Nazirliyinin Birləşmiş Həmkarlar İttifaqları Komitəsinin sədr müavini Aygün Məmmədova, Gəncə Şəhər İcra Hakimiyyətinin və DİİXHİ Gəncə Şəhər Komitəsinin əməkdaşları ilə birgə Gəncənin Ermənistan silahlı qüvvələri tərəfindən raket atəşinə məruz qalmış ərazisini ziyarət ediblər.
Burada məlumat verilib ki, Vətən müharibəsi zamanı Gəncə ümumilikdə 5 dəfə (4, 5, 8, 11 və 17 oktyabr 2020-ci il tarixlərində) raket atəşinə məruz qalıb. Nəticədə 6-sı uşaq və yeniyetmə olmaqla, ümumilikdə 26 nəfər həlak olmuş, 29-u uşaq olmaqla, ümumilikdə 142 insan isə müxtəlif dərəcəli bədən xəsarətləri almışdır. Bu hadisələr zamanı 3 ailənin üzvü olan 4 uşaq hər iki valideynini itirmişdir. Qeyd edilənlərlə yanaşı raket zərbələri nəticəsində 1 məktəbəqədər təhsil müəssisəsi tamamilə dağılmış, 10-a yaxın məktəbəqədər, 10-a yaxın orta təhsil müəssisəsinə ziyan dəymişdir.
Qonaqlar mülki şəhidlərin xatirəsinə ehtiram əlaməti olaraq əraziyə güllər düzüblər.
Daha sonra Həmkarlar İttifaqının əməkdaşları mülki şəhidlərin ailələrini ziyarət edib, onlarla söhbət aparıblar.
