Gəncə Şəhər İcra Hakimiyyətinin başçısı Niyazi Bayramov şəhər əhalisini müqəddəs Qurban bayramı münasibətilə təbrik edib.
Təbrik mətnini sizlərə təqdim edirik:
Hörmətli şəhid ailələri, müharibə iştirakçıları və şəhər sakinləri!
Sizi müqəddəs Qurban bayramı münasibətilə ürəkdən təbrik edir, hər birinizə möhkəm cansağlığı, ailə səadəti, ruzi-bərəkət və firavan həyat arzulayıram.
İslam dünyasının ən əziz və mənəvi dəyərləri özündə birləşdirən Qurban bayramı insanları mərhəmətə, xeyirxahlığa, birlik və həmrəyliyə səsləyir. Bu müqəddəs bayram cəmiyyətimizdə milli-mənəvi dəyərlərin yaşadılmasına, insanlar arasında qarşılıqlı sevgi və qayğının daha da möhkəmlənməsinə xidmət edir.
Bu gün ölkə Prezidenti cənab İlham Əliyevin rəhbərliyi və Birinci vitse-prezident Mehriban xanım Əliyevanın diqqət və qayğısı ilə şəhid ailələri, müharibə iştirakçıları və veteranları daim dövlətin xüsusi himayəsi ilə əhatə olunur. Dövlətimizin həyata keçirdiyi sosial siyasət xalqımızın rifahının yüksəldilməsinə, milli həmrəyliyin və vətəndaş birliyinin daha da gücləndirilməsinə xidmət edir.
Qurban bayramı günlərində şəhid ailələrinə, qazilərimizə, aztəminatlı ailələrə diqqət göstərmək, ehtiyacı olan insanlarla həmrəy olmaq hər birimizin mənəvi borcudur. Əminəm ki, xalqımız hər zaman öz milli-mənəvi dəyərlərinə sadiq qalaraq birlik və bərabərlik nümayiş etdirəcəkdir.
Uca Allah etdiyiniz duaları və kəsdiyiniz qurbanları qəbul etsin, doğma Azərbaycanımıza daim sülh, əmin-amanlıq və tərəqqi nəsib etsin.
Bir daha hər birinizi müqəddəs Qurban bayramı münasibətilə təbrik edir, ailələrinizə xoşbəxtlik və sevinc arzulayıram.
Qurban bayramınız mübarək!
Niyazi Bayramov
Gəncə Şəhər İcra Hakimiyyətinin başçısı