Gəncə-Daşkəsən Regional Təhsil İdarəsinin təşkilatçılığı ilə Gəncə Dövlət Milli Dram Teatrında 5 Oktyabr – Beynəlxalq Müəllimlər Gününə həsr olunmuş tədbir baş tutub.
Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, millət vəkili Pərvin Kərimzadə, Gəncə-Daşkəsən Regional Təhsil İdarəsinin müdiri Elçin Kərimov, Gəncə Tibb Kollecinin direktoru, Əməkdar həkim Mehman Rzayev, idarə, müəssisə, təşkilat rəhbərləri, şəhid ailələri və təhsil işçiləri iştirak ediblər.
Əvvəlcə rəsmilər Heydər Əliyev Mərkəzinin qarşısında ucaldılmış Ulu Öndərin abidəsini ziyarət ediblər.
Tədbir Dövlət Himninin səsləndirilməsi ilə başlayıb. Daha sonra Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.
Çıxış edən rəsmilər müəllimləri bayram münasibətilə təbrik edərək, onlara möhkəm can sağlığı və uğurlar arzulayıblar.
Daha sonra respublika üzrə keçirilən monitorinqlərin, buraxılış imtahanlarının nəticələrinə, həmçinin fənn olimpiadaları və müsabiqələrdə, Beynəlxalq STEAM festivalında şagirdləri uğur qazanmış müəllim və məktəb direktorları təltif olunublar.
Tədbir Gəncə Uşaq-İncəsənət məktəbinin “Xəmsə” nağara ansamblının, 44 nömrəli məktəb-liseyin şagirdlərinin və Uşaq-Gənclər İnkişaf Mərkəzinin dərnək üzvlərinin rəqs və musiqi kompozisiyaları ilə davam edib.
