Gəncə Dövlət Universitetinin Filologiya və Xarici dillər fakültəsinin Azərbaycan dili kafedrasında “21 Fevral-Beynəlxalq Ana Dili Günü” adlı tədbir keçirilib.
Universitetin Humanitar məsələlər üzrə prorektoru Gülsüm Fətəliyeva giriş sözü ilə açaraq ölkəmizdə ana dilinə göstərilən diqqət və qayğıdan, eləcə də bu sahədə hər bir vətəndaşın üzərinə düşən vəzifələrdən danışıb. Prorektor qeyd edib ki, bu gün Respublikamızda ana dilinin qorunması üçün Prezident İlham Əliyev tərəfindən diqqət və qayğı ilə yanaşılır. Azərbaycan dilinin bugünkü inkişaf səviyyəsi xalqımızın dünyanın ən qədim xalqlarından biri olduğunu təsdiqləyir.
Tədbirdə Dövlət Dil Komissiyasının üzvü Mübariz Yusifov “Ana dilinin sabitlik problemləri”, Azərbaycan dili kafedrasının müdiri Telman Quliyev “Beynəlxalq Ana Dili Günü”, Azərbaycan dili kafedrasının dosenti Yadigar Əliyev “Ana dili milli kimliyimizdir”, Azərbaycan və dünya ədəbiyyatı kafedrasının müdiri Səba Namazova “Türk dünyasını birləşdirən dil, ortaq yaddaş və mədəniyyət”, Azərbaycan dili kafedrasının müəllimi Ayşən Nəbiyeva “21 Fevral-Beynəlxalq Ana Dili Günüdür”, Azərbaycan dili kafedrasının müəllimi Günel Məmmədova “Dil düşüncənin güzgüsüdür” adlı məruzələrlə çıxış ediblər.
Sonda Filologiya və Xarici dillər fakültəsinin tələbələri ana dilimizə həsr edilmiş şeirlər söyləyiblər.
