Gəncə Şəhər İcra Hakimiyyətinin, Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin və Azərbaycan Dövlət Aqrar Universitetinin nəzdində fəaliyyət göstərən Gəncə Dövlət Aqrar Kollecinin birgə təşkilatçılığı, həmçinin Gəncə Dövlət Tarix-Mədəniyyət Qoruğunun iştirakı ilə “Gəncənin mədəni irsini tanıyaq və qoruyaq” mövzusunda maarifləndirici tədbir baş tutub.
Əvvəlcə Azərbaycan Respublikasının Dövlət Himni səsləndirilib. Daha sonra Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Tədbirdə Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, Gəncə Dövlət Aqrar Kollecinin direktoru Fəqan Ağayev, Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin baş mütəxəssisi Gülnar Abuzərli, Gəncə Dövlət Tarix-Mədəniyyət Qoruğunun direktor müavini Fəqan Məmmədov, müəllimlər və tələbələr iştirak ediblər.
Bildirilib ki, Azərbaycan xalqının Ümummilli Lideri Heydər Əliyev tərəfindən əsası qoyulan və bu gün Prezident cənab İlham Əliyevin müdrik rəhbərliyi ilə uğurla davam etdirilən dövlət mədəniyyət siyasətinin əsas istiqamətlərindən biri tarixi-mədəni irsin qorunması və təbliği, eləcə də dünya mədəni irsi sahəsində maarifləndirmənin aparılmasıdır. Birinci vitse-prezident, Heydər Əliyev Fondunun rəhbəri Mehriban xanım Əliyeva tərəfindən həyata keçirilən ardıcıl və məqsədyönlü fəaliyyət nəticəsində ölkəmizin mədəni irs nümunələrinin YUNESKO-nun Ümumdünya İrs Siyahısına daxil edilməsi bu sahəyə göstərilən dövlət qayğısının bariz nümunəsidir.
Eyni zamanda vurğulanıb ki, “Tarix və mədəniyyət abidələrinin qorunması haqqında” Azərbaycan Respublikasının Qanununa və Azərbaycan Respublikası Konstitusiyasının 77-ci maddəsinə əsasən tarix və mədəniyyət abidələrini qorumaq hər bir vətəndaşın borcudur. Tarix və mədəniyyət abidələri xalqın milli sərvətidir. Odur ki, sürətlə müasirləşən dünyada mədəni irsin qorunması və gələcək nəsillərə ötürülməsi xüsusi əhəmiyyət kəsb edir.
Sonda tələbə-gənclərə Gəncə şəhərində yerləşən tarix və mədəniyyət abidələri haqqında slaydlar vasitəsilə geniş məlumat təqdim olunub.
Xatırladaq ki, “Azərbaycan Respublikası ərazisində dövlət mühafizəsinə götürülmüş daşınmaz tarix və mədəniyyət abidələrinin əhəmiyyət dərəcələrinə görə bölgüsünün təsdiq edilməsi haqqında” Azərbaycan Respublikası Nazirlər Kabinetinin 2001-ci il 2 avqust tarixli, 132 nömrəli Qərarına əsasən, Gəncə şəhəri ərazisində qeydiyyata alınmış dünya, ölkə və yerli əhəmiyyətli daşınmaz tarix və mədəniyyət abidələrinin sayı 258-dir. Bunlardan 1-i dünya əhəmiyyətli, 37-si ölkə əhəmiyyətli, 220-si isə yerli əhəmiyyətli abidələrdir. Gəncə şəhərində tarix və mədəniyyət abidələrinin mühafizəsinin təmin edilməsi və yeni aşkar olunmuş abidələrin dövlət mühafizəsinə götürülməsi istiqamətində işlər mütəmadi olaraq davam etdirilir.
