Gəncədə “Kəpəz” Peşəkar Futbol Klubunun nəzdində fəaliyyət göstərən “Gəncənin futbol əfsanələri” şurasının növbəti iclası baş tutub. Klubun Akademiyasında təşkil olunan tədbir şəhərin futbol ictimaiyyətini bir araya gətirib, geniş maraqla qarşılanıb.
İclas iştirakçıları əvvəlcə Xocalı soyqırımı qurbanlarını bir dəqiqəlik sükutla yad ediblər. Daha sonra infrastruktur rəhbəri Ruslan Məmmədov Akademiyada son dövrlərdə görülən işlər, infrastruktur sahəsində həyata keçirilən yeniliklər və qarşıda duran planlar barədə məlumat verib. O, həmçinin kluba yeni təyin olunmuş İctimaiyyətlə əlaqələr üzrə koordinator Nofəl Əzizovu iştirakçılara təqdim edib.
Patriot News.az xəbər verir ki, tədbirdə çıxış edənlər arasında şuranın sədri Əli Rəhimov, Gəncə-Daşkəsən Regional Gənclər və İdman İdarəsinin rəisi Elşən Hüseynov, 1 nömrəli Uşaq-Gənclər İdman-Şahmat Məktəbinin müdiri və cüdo üzrə paralimpiya çempionu Ramil Qasımov, “PatriotNews.az” saytının rəhbəri Ceyhun Əliyev, “Qarabağ Qaziləri” İctimai Birliyinin Gəncə filialının sədri Eyvaz Hüseynov, “Kəpəz” PFK-nın baş məşqçisi Azər Bağırov, eləcə də Gəncənin veteran futbolçuları yer alıb. Çıxışlarda klubun fəaliyyəti, gənc nəsilin idmana cəlb olunması, veteranlar və şəhid ailələrinə göstərilən diqqət barədə fikir mübadiləsi aparılıb.
Tədbirin sonunda Eyvaz Hüseynov, “Kəpəz” PFK-nın İdarə Heyətinin üzvü Fərman Əlizadəyə şəhid ailələrinə və qazilərə göstərdiyi diqqət və qayğıya görə təşəkkürnamə təqdim edib.
@Patriot News.az
