YAP Gəncə şəhər təşkilatının inzibati binasında “Qərbi Azərbaycan irsi” kitabının I cildinin təqdimat mərasimi keçirilib.
Tədbirdə Gəncə Şəhər İcra Hakimiyyəti başçısının müavini Adil Tağıyev, Türkiyənin Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, Qərbi Azərbaycan İcmasının İdarə Heyətinin üzvü, Zəngibasar rayon icmasının sədri Mirfaiq Mirheydərli, GDU-nun rektoru, professor Yusif Yusibov, ADAU-nun rektoru Zəfər Qurbanov, ATU-nun rektoru Yaşar Ömərov, idarə və müəssisə rəhbərləri, ictimaiyyət nümayəndələri iştirak ediblər.
Əvvəlcə rəsmilər inzibati binanın foyesində Ümummilli Lider Heydər Əliyevin büstünü ziyarət edib, önünə gül dəstələri düzüblər.
Tədbirdə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib, ardınca Dövlət Himni səsləndirilib. Azərbaycanlıların Qərbi Azərbaycandan deportasiyasına həsr olunmuş sənədli videoçarx nümayiş etdirilib.
Adil Tağıyev tədbir iştirakçılarını Gəncə Şəhər İcra Hakimiyyətinin başçısı Niyazi Bayramovun adından salamlayaraq bildirib ki, Qərbi Azərbaycanla bağlı həqiqətlərin araşdırılması və dünya ictimaiyyətinə çatdırılması dövlət siyasətinin əsas istiqamətlərindəndir. “Qərbi Azərbaycan irsi” kitabı bu baxımdan tarixi yaddaşın qorunmasında mühüm rol oynayır. Qeyd olunub ki, azərbaycanlıların Qərbi Azərbaycandan kütləvi deportasiyasına ilk hüquqi-siyasi qiymət Ümummilli Lider Heydər Əliyev tərəfindən verilib.
Mirfaiq Mirheydərli qeyd edib ki, nəşr elmi, tarixi və ideoloji baxımdan əhəmiyyətlidir. Kitabda toplanmış etnoqrafik, toponimik və demoqrafik məlumatlar dəqiq və sənədlərlə əsaslandırılıb. O, ermənilər tərəfindən dağıdılmış məscidlərin, məktəblərin, qəbiristanlıqların və digər maddi-mədəni irs nümunələrinin sənədləşdirilməsinin gələcək nəsillərə ötürülən dəyərli məlumatlar olduğunu vurğulayıb.
Tədbirdə çıxış edən Bayram Aslanov, Zəfər Qurbanov və Azərbaycan Dövlət Aqrar Universitetinin professoru, Əməkdar kənd təsərrüfatı işçisi Ziyad Abbasov nəşrin ictimai hesabatlılıq və milli kimliyin qorunması baxımından vacib olduğunu qeyd ediblər. Bildirilib ki, kitabda əks olunan faktlar azərbaycanlıların yaddaşına, mənəviyyatına və tarixinə vurulan zərbələri əks etdirir.
Bildirilib ki, Prezident İlham Əliyevin 2022-ci il dekabrın 24-də Qərbi Azərbaycan İcmasında ziyalılarla görüşü Qayıdış Konsepsiyasının formalaşmasında mühüm mərhələ olub.
