Bu gün Pravoslav xristianları İsa Məsihin mübarək mövludunu — Milad bayramını qeyd edirlər. Bu münasibətlə Gəncə şəhərində yerləşən Aleksandr Nevski adına Rus Pravoslav Kilsəsində mərasim keçirilib. Əvvəlcə Azərbaycan Respublikasının Prezidenti İlham Əliyevin Milad bayramı münasibətilə ünvanladığı təbrik oxunub. Daha sonra kilsənin dini heyəti Həzrəti İsanın mövludu ilə bağlı ayinlər icra edib.
Pravoslav icmasının üzvləri kilsədə şamlar yandıraraq sülh, əmin-amanlıq və xoşbəxtlik diləkləri ilə dualar oxuyub, xaç suyu içiblər.
Mərasimin dini icmalar arasında qarşılıqlı hörmətin qorunmasına göstərilən diqqətə görə Gəncə Şəhər İcra Hakimiyyətinin başçısı Niyazi Bayramova və DQİDK Gəncə-Daşkəsən Regional Bölməsinə təşəkkür bildirilib.
Qeyd edək ki, xristian aləminin ən əlamətdar və təntənəli bayramlarından biri olan Milad ənənəyə görə yanvarın 6-dan 7-nə keçən gecə İsa Məsihin Vifleyem şəhərində dünyaya gəlməsi münasibətilə qeyd olunur. Hazırda bu bayram yüzdən artıq ölkədə rəsmi dövlət bayramı kimi qeyd edilir.
