Azərbaycan Respublikası Mədəniyyət Nazirliyi tərəfindən regionlarda həyata keçirilən səyyar sərgilər layihəsi uğurla davam edir.
Layihə çərçivəsində F.Əmirov adına Gəncə Dövlət Filarmoniyasının Urban Mərkəzində “Həmrəyliyin rəngləri” adlı sərgi nümayiş olunub. Sərgi 31 Dekabr – Dünya Azərbaycanlılarının Həmrəyliyi Günü münasibətilə təşkil edilib.
Açılış mərasimində Gəncə Şəhər İcra Hakimiyyəti başçısının müavini Adil Tağıyev və Azərbaycan Respublikası Mədəniyyət Nazirliyinin İncəsənət və qeyri-maddi mədəni irs şöbəsinin müdiri İntiqam Babayev çıxış edərək iştirakçıları qarşıdan gələn Həmrəylik Günü münasibətilə təbrik edib, sərginin əhəmiyyətini vurğulayıblar.
Qeyd olunub ki, sərginin ekspozisiyası iki əsas istiqaməti əhatə edir. Fotoqrafiya bölməsində Azərbaycan Fotoqraflar Birliyinin üzvü olan peşəkar fotoqrafların əsərləri təqdim olunub. Fotolarda azərbaycançılıq ideyasının əsasını təşkil edən birlik və həmrəylik, xalqımızın multikultural və tolerant dəyərləri, eləcə də torpağa bağlılıq və milli qürur hissləri əks etdirilib.
Tədbirin bədii hissəsində Gəncə Dövlət Filarmoniyasının Xalq çalğı alətləri orkestri geniş konsert proqramı ilə çıxış edib.
