Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin psixonevroloji sosial xidmət müəssisələrinin və 4 saylı Uşaq evinin sakinlərinin iştirakı ilə “DəyərliSən” inklüziv festivalı təşkil edilib.
Gəncə Dövlət Filarmoniyasında keçirilən tədbir 20 noyabr – Ümumdünya Uşaq Hüquqları Günü və 3 Dekabr – Beynəlxalq Əlilliyi olan Şəxslər Gününə həsr olunub.
Festivalda millət vəkili Pərvin Kərimzadə, Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, Sosial Xidmətlər Agentliyinin İdarə Heyəti sədrinin müavini Pərviz Səfərov, Türkiyənin Gəncədəki Baş konsulluğunun, Azərbaycan Respublikasının İnsan Hüquqları üzrə Müvəkkilinin (Ombudsmanın) Qərb Regional Mərkəzinin, Gəncə-Daşkəsən Regional Mədəniyyət İdarəsinin və digər dövlət qurumlarının nümayəndələri, ictimaiyyət üzvləri iştirak ediblər.
Pərviz Səfərov Agentlik tərəfindən göstərilən xidmətlər haqqında məlumat verib. O qeyd edib ki, Agentliyin respublika üzrə 13 filialı və 21 sosial xidmət müəssisəsi var və qurumun fəaliyyəti stasionar, yarımstasionar və səyyar xidmətləri əhatə edir. Hazırda həssas əhali qruplarına aid 2272 şəxs Agentliyin müəssisələrində daimi dövlət himayəsində sosial və reabilitasiya yönümlü xidmətlərlə təmin edilir.
Gəncə Şəhər İcra Hakimiyyətinin şöbə müdiri Yadigar Bədəlov bu kimi tədbirlərin həssas əhali qruplarından olan şəxslərin cəmiyyətə inteqrasiyasında mühüm rol oynadığını bildirib. Qeyd edib ki, regionlarda müvafiq istiqamətdə festivalların sayının artırılması inklüzivlik mədəniyyətinin genişlənməsinə və bu sahədə ictimai fəallığın artmasına töhfə verəcək.
“DəyərliSən” inklüziv mədəni festivalının məqsədi xüsusi qayğıya ehtiyacı olan şəxslərin cəmiyyətə inklüziyasını təmin etmək, ictimai həyatda fəal iştirakına şərait yaratmaq, eləcə də onların yaradıcı potensiallarını üzə çıxarmaq olub.
Festival iştirakçıları sosial xidmət müəssisələrinin sakinlərinin əl işlərindən ibarət sərgi ilə tanış olub, uşaqların ifasında müxtəlif ədəbi-bədii kompozisiyaları izləyiblər.
