Gəncə şəhərində Uşaq Səfirlər Məclisinin fəallarının təşəbbüsü, Gəncə Şəhər İcra Hakimiyyəti və Gəncə-Daşkəsən Regional Təhsil İdarəsinin dəstəyi ilə buraxılış imtahanı ərəfəsində şagirdlərin psixoloji hazırlığı və stressin idarə olunması mövzusunda maarifləndirici görüş təşkil olunub.
Gəncə Şəhər İcra Hakimiyyəti yanında fəaliyyət göstərən Uşaq hüquqlarının müdafiəsi üzrə Komissiyanın məsul katibi Xalidə Mete bildirib ki, görüşün əsas məqsədi buraxılış imtahanına hazırlaşan şagirdlərin psixoloji dəstəyini gücləndirmək və onların imtahan prosesinə daha inamla yanaşmalarına kömək etməkdir.
Görüş zamanı imtahan öncəsi yaranan həyəcan və stressin səbəbləri, onların aradan qaldırılması yolları, düzgün vaxt bölgüsü və imtahana psixoloji hazırlığın əhəmiyyəti barədə iştirakçılara ətraflı məlumat verilib.
Dövlət İmtahan Mərkəzinin (DİM) Gəncə Regional Bölməsinin direktoru Nəsimi Məmmədov qeyd edib ki, imtahanlara hazırlıq prosesində şagirdlərin yalnız bilik baxımından deyil, həm də psixoloji cəhətdən hazır olmaları mühüm əhəmiyyət kəsb edir. O, şagirdlərə imtahan qaydaları və düzgün hazırlıq strategiyaları barədə tövsiyələr verib.
Gəncə şəhər M. Mehtizadə adına 4 nömrəli xarici dil təmayüllü məktəb-liseyin psixoloqu Günay Bayramova isə stressin idarə olunması, həyəcanın azaldılması və diqqətin toplanması üçün praktik üsullar haqqında danışıb, şagirdlərin suallarını cavablandırıb.
Görüş interaktiv müzakirələrlə davam edib və iştirakçılar üçün faydalı tövsiyələrlə yadda qalıb.
