Türkiyə Respublikasının Gəncədəki Baş Konsulluğunun təşkilatçılığı ilə 15 İyul – Demokratiya və Milli Birlik Günü münasibətilə anım tədbiri keçirilib. Tədbirdə Türkiyənin Gəncədəki Baş konsulu Recep Öztop, Gəncə Şəhər İcra Hakimiyyəti başçısının müavini Adil Tağıyev, bələdiyyə sədrləri, idarə və müəssisə rəhbərləri, eləcə də şəhər ictimaiyyətinin nümayəndələri iştirak ediblər.
Əvvəlcə Vətən uğrunda şəhid olanların əziz xatirəsi bir dəqiqəlik sükutla yad edilib, Türkiyə və Azərbaycan Respublikalarının dövlət himnləri səsləndirilib. Daha sonra din xadimi tərəfindən şəhidlərin xatirəsinə dualar oxunub.
Recep Öztop çıxışında 15 İyul – Demokratiya və Milli Birlik Gününün əhəmiyyətindən bəhs edib. O qeyd edib ki, 2016-cı il iyulun 15-də Türkiyə tarixində ən ağır çevriliş cəhdi baş verdi. Ancaq xalq Prezident Rəcəb Tayyib Ərdoğanın çağırışına səs verərək küçə və meydanlara axışdı, dövlətini, demokratiyanı və milli birliyini qorumaq üçün qətiyyət nümayiş etdirdi. Bu gün türk xalqı həmin hadisələr zamanı şəhid olmuş vətən övladlarını böyük minnətdarlıq və ehtiramla yad edir.
Adil Tağıyev çıxışında iştirakçıları Gəncə Şəhər İcra Hakimiyyətinin başçısı Niyazi Bayramovun adından salamlayaraq bildirib ki, 15 iyul 2016-cı il tarixində türk xalqı milli birliyini və konstitusion quruluşunu qoruyaraq çevrilişə cəhd edən qüvvələrə qarşı tarixi qələbə qazandı. O, qeyd edib ki, bu hadisə zamanı Azərbaycan bir daha “Bir millət, iki dövlət” prinsipinə sadiqliyini nümayiş etdirdi. Belə ki, dövlət çevrilişinə cəhd zamanı Azərbaycan bütün gücü ilə Türkiyənin yanında oldu. Hadisənin ilk anlarından böyük narahatlığını bildirən möhtərəm Prezident cənab İlham Əliyev Türkiyə dövlətinə olan dəstəyini açıq şəkildə ifadə etdi.
Tədbirin sonunda 15 İyul – Demokratiya və Milli Birlik Gününə həsr olunmuş videoçarx nümayiş etdirilib.
