Azərbaycan Respublikası Səhiyyə Nazirliyi Gəncə Tibb Kollecində “Konstitusiya və Suverenlik İli” çərçivəsində “Azərbaycanın müstəqilliyi əbədidir, daimidir, dönməzdir” mövzusunda konfrans təşkil olunub.
Tədbir Dövlət Himninin səsləndirilməsi ilə başlayıb. Ümummilli Lider Heydər Əliyevin, eləcə də Azərbaycanın müstəqilliyi, ərazi bütövlüyü və suverenliyi uğrunda canlarından keçən şəhidlərin xatirəsi bir dəqiqəlik sükutla yad edilib.
Açılış nitqi ilə çıxış edən kollecin direktoru, Əməkdar həkim Mehman Rzayev bildirib ki, “Konstitusiya və Suverenlik İli” çərçivəsində keçirilən tədbirlər Azərbaycan dövlətçiliyinin möhkəmlənməsinə, milli-mənəvi dəyərlərin qorunmasına və gənc nəslin vətənpərvərlik ruhunda yetişdirilməsinə mühüm töhfə verir. O vurğulayıb ki, gənclərdə dövlətçilik ənənələrinə hörmət və ictimai məsuliyyət hissinin formalaşdırılması kollecin daim diqqət mərkəzindədir.
Konfransın qonağı – hüquq elmləri doktoru, professor, Müharibə, Əmək və Silahlı Qüvvələr Veteranları Təşkilatının sədrinin müşaviri, Azərbaycan Ağsaqqallar Şurasının İdarə Heyətinin üzvü İbrahim Quliyev çıxışında Azərbaycan Konstitusiyasının qəbul edilməsindən, ölkədə idarəetmə forması və suverenliyin bərpası prosesindən bəhs edib. O, həmçinin 44 günlük Vətən müharibəsində Ali Baş Komandan İlham Əliyevin rəhbərliyi ilə qazanılan möhtəşəm Qələbənin tariximizdə xüsusi yer tutduğunu diqqətə çatdırıb.
Professor Heydər Əliyevin Konstitusiya Günü münasibətilə səsləndirdiyi fikirləri xatırladaraq bildirib ki, Azərbaycan Konstitusiyası dövlət quruculuğu, vətəndaş hüquq və azadlıqlarının təminatı və demokratik inkişaf üçün etibarlı hüquqi baza rolunu oynayır. O qeyd edib ki, Konstitusiyanın ümumbəşəri və milli dəyərlərə söykənməsi onun əsas üstünlüklərindəndir.
İbrahim Quliyev vurğulayıb ki, Azərbaycan Konstitusiyası demokratik idarəetməni, insan ləyaqətinə hörməti, hüquqların müdafiəsini və sosial ədaləti təmin edən fundamental prinsipləri özündə ehtiva edir. Natiq bildirib ki, 44 günlük Vətən müharibəsində qazanılan Zəfər ölkəmizin müstəqillik tarixində əbədi iz qoyub və bu gün Azərbaycan tam suveren dövlət olaraq bütün ərazilərində Konstitusiyanın və qanunların tam bərpa olunduğu bir mərhələyə qədəm qoyub.
