Gəncə Dövlət Universitetinin (GDU) professor-müəllim heyəti Oğuz rayon Təhsil sektorunda orta ümumtəhsil məktəblərin yuxarı sinif şagirdləri ilə görüş keçiriblər. Görüşdə həmçinin Oğuz rayon təhsil sektorunun müdiri Sərdar Nəbiyev, Oğuz rayon YAP – ın sədri Saleh Məhərrəmov da iştirak ediblər.
Oğuz şəhər Nail İbrahimli adına 3 nömrəli məktəb-liseyin direktoru Elxan Bilalov çıxış edərək görüşün əhəmiyyətindən danışıb. Diqqətə çatdırıb ki, məqsəd Gəncə Dövlət Universiteti ilə rayonda fəaliyyət göstərən ümumtəhsil məktəbləri arasında əməkdaşlıq əlaqələrini daha da möhkəmləndirmək və universitetdə tədris olunan ixtisaslar barədə şagirdləri ətraflı məlumatlandırmaqdır.
Universitetin işçi qrupunun üzvləri dosent işçi qrupunun üzvləri C. Qarayev, A. Quliyev, C. Bağırzadə və V. Babayev universitetin fəaliyyəti, ali təhsil ocağında tədris olunan ixtisaslar barədə geniş məlumat veriblər. Universitetin beynəlxalq elmi əlaqələri, eləcə də Gəncə Dövlət Universiteti və Türkiyə Respublikasının Dokuz Eylül Universiteti arasında imzalanmış əməkdaşlıq müqaviləsinə əsasən ikili diplom proqramı çərçivəsində tədris olunan ixtisaslar və bu istiqamətdə tələbələrə yaradılan imkanlardan bəhs olunub.
Daha sonra Gəncə Dövlət Universitetinin tədris binaları, kitabxanaları, idman zalları, laboratoriyaları, auditoriyaları və Tələbə Evi haqqında videoçarx nümayiş etdirilib.
Görüşün sonunda şagirdlərə universitetin fəaliyyətinə dair məlumat kitabçası, diyircəkli qələm və dəftərçə təqdim olunub.
Mətbuat və ictimaiyyətlə əlaqələr xidməti
