Bakı Ali Neft Məktəbinin (BANM) rektoru Elmar Qasımovun rəhbərlik etdiyi nümayəndə heyəti Azərbaycan Dövlət Aqrar Universitetinə (ADAU) işgüzar səfərə gəlib.
Səfərin birinci günündə nümayəndə heyəti əvvəlcə Gəncə Memorial Kompleksini ziyarət edib. Qonaqlar memorial lövhənin qarşısına gül dəstələri düzərək, Vətən müharibəsi şəhidlərinin xatirəsini bir dəqiqəlik sükutla yad ediblər.
Kompleksin Muzeyində ekspozisiyalarla tanış olan ziyarətçilərə bildirilib ki, Prezident İlham Əliyev tərəfindən 2025-ci il sentyabrın 27-də – Anım Günündə açılışı həyata keçirilən bu kompleks İkinci Qarabağ müharibəsi zamanı Ermənistanın raket hücumlarının qurbanı olmuş günahsız insanların əziz xatirəsini əbədiləşdirmək və müharibənin acı reallıqlarını gələcək nəsillərə çatdırmaq məqsədi daşıyır.
Daha sonra Nizami Gəncəvi məqbərəsi, Butulkalı ev və Gəncə Şəhər Ekoloji Park Kompleksi ziyarət olunub.
Həmçinin, qonaqlar ADAU-nun Tədris-təcrübə təsərrüfatında olub, burada tədris və istehsal prosesinin təşkili, mövcud infrastruktur və tələbələrin praktik biliklərinin artırılması istiqamətində görülən işlərlə tanış olublar.
Sonda BANM-in nümayəndə heyəti Azərbaycan Xalq Cümhuriyyəti Muzeyini ziyarət edib. Muzeydə nümayiş etdirilən eksponatlarla tanışlıq zamanı Azərbaycan Xalq Cümhuriyyətinin dövlətçilik tarixindəki rolu, milli irsin qorunmasının və gənc nəslin vətənpərvərlik ruhunda formalaşdırılmasının əhəmiyyəti xüsusi qeyd olunub. Bakı Ali Neft Məktəbinin rektoru Elmar Qasımovun muzeyin xatirə kitabına ürək sözlərini yazıb.
