Azərbaycan Dövlət Aqrar Universitetinin (ADAU) tərkibində İnnovasiya və Rəqəmsal İnkişaf Agentliyinin dəstəyi ilə yaradılan Azərbaycan İnnovasiya Mərkəzinin açılışı keçirilib. Yeni mərkəzin fəaliyyətə başlaması təkcə ADAU üçün deyil, bütövlükdə Qərb regionu üçün innovasiya ekosisteminin gücləndirilməsində mühüm bir mərhələdir.
Açılış mərasimində ADAU-nun rektoru, professor Zəfər Qurbanov çıxış edərək bildirib ki, Azərbaycan İnnovasiya Mərkəzinin yaradılması universitetdə təhsilin, elmin və innovasiyanın inteqrasiyası istiqamətində atılmış vacib addımdır. O vurğulayıb ki, yeni mərkəz tələbələrin yaradıcılıq potensialını üzə çıxarmasına, startap təşəbbüslərinin dəstəklənməsinə və aqrar sahədə rəqəmsal həllərin inkişafına ciddi təkan verəcək:
“Bu mərkəz gənclərimizin ideyalarını real layihələrə çevirəcək, onlar artıq burada həm prototiplər hazırlaya, həm də öz həllərini qlobal bazara çıxarmaq üçün lazımi innovasiya mühitindən yararlana biləcəklər. Bu əməkdaşlıq ADAU-nun elm və innovasiya istiqamətində yeni bir mərhələyə keçididir”, – deyə rektor Zəfər Qurbanov qeyd edib.
Mərasimdə həmçinin vurğulanıb ki, müasir avadanlıq və rəqəmsal imkanlarla təchiz edilən mərkəz Qərb bölgəsində startap mədəniyyətinin formalaşmasına, innovativ layihələrin inkişafına və insan kapitalının gücləndirilməsinə xidmət edəcək.
Bu əməkdaşlıq regionda innovasiya ekosisteminin genişlənməsinə, rəqəmsal transformasiya proseslərinin sürətlənməsinə və yeni texnoloji həllərin meydana çıxmasına mühüm töhfə verəcək.
Sonda bu uğurlu layihənin gerçəkləşməsinə verdiyi dəstəyə görə İnnovasiya və Rəqəmsal İnkişaf Agentliyinə təşəkkür edilib.
